Shërbimet e Policisë së Qarkut Shkodër, në bashkëpunim me Njësinë e Sigurisë Publike, vijojnë me intensitet zbatimin e operacionit policor të koduar “Koordinata”, i cili ka për qëllim goditjen e kultivimit të bimëve narkotike në të gjithë territorin e qarkut.
Gjatë kontrolleve të kryera në territorin e 6 njësive administrative janë evidentuar dhe asgjësuar 4291 bimë të dyshuara narkotike të llojit Cannabis Sativa.
Detaje nga operacioni:
Në njësitë administrative Pult, Ana e Malit, Shosh dhe Shalë, shërbimet e Komisariatit të Policisë Shkodër gjetën dhe asgjësuan 4107 bimë narkotike.
Si rezultat i veprimeve procedurale, janë referuar materialet në Prokurori dhe ka nisur procedimi penal në gjendje të lirë për veprën penale “Shpërdorimi i detyrës”, ndaj 5 kryetarëve të fshatrave:
L. L. – kryetar i fshatit Nënmavriq
D. V. – kryetar i fshatit Pecaj
P. Sh. – kryetar i fshatit Gimaj
N. M. – kryetar i fshatit Abat
P. S. – kryetar i fshatit Lekaj
Në njësinë administrative Shkrel, Komisariati i Policisë Malësi e Madhe gjeti dhe asgjësoi 60 bimë të dyshuara Cannabis Sativa.
Në njësinë administrative Temal, shërbimet e Komisariatit të Policisë Vau i Dejës identifikuan dhe asgjësuan 124 bimë narkotike.
Policia bën me dije se operacioni “Koordinata” do të vijojë në të gjithë territorin e qarkut Shkodër. Po ashtu, vijon puna për identifikimin, kapjen dhe vënien përpara përgjegjësisë penale të personave përgjegjës për kultivimin e këtyre bimëve narkotike.
