Kandidati për Kryeministër Albin Kurti ka thënë se Vetëvendosje është kundër ndryshimit të kufirit e jo kundër Demarkacionit.
“Qeveria e Vetëvendosjes do të formojë një trup i cili do të bëjë hetimin e bazës së procedurës së rezultatit të kësaj marrëveshje që është e mbrapshtë prej fillimit e deri në fund. Murat Meha nga negociuar gabimisht, nuk negociohet me Malin e Zi vetëm me libra kadastral, Mali i Zi s’ka libra kadastral për Rozhajën, prandaj pse e bëri qeveria e Meha e pastaj e nënshkroi Thaçi”, tha ai.
“Ne duhet të presim këtë hetim që kuptojmë plotësisht motivin e një negocimi të tillë të mbrapshtë. Ne jemi kundër ndryshimit të kufirit. Ne jemi për demarkacion me Malin e Zi por jo për ndryshim kufiri. Kjo nënkupton bisedime për ri-negocim me Malin e Zo, s’kemi nevojë të armiqësohemi, Mali i Zi s’ka llogari t’i prishë marrëdhëniet me shqiptarët”, tha Kurti.
Kurti tha se nuk kanë problem me Malin e Zi por me Murat Mehën dhe Hashim Thaçin.
Ai tha se sa më shumë zëra që janë kundër ndryshimit të kufirit, aq më mirë do të jetë për qeverinë e Vetëvendosjes, edhe ata që janë në opozitë ta mbështesin qeverinë e Vetëvendosjes.
“Ne jemi kundër armiqësive, jemi për partneritet. Vetëvendosje do ta sjell kulturën demokratike. Nuk do bëhemi as servil e as armiqësor”, tha Kurti.
