Pajisjet e kontrollit të sigurisë në aeroporte të afta për të skanuar përmbajtjen e enëve të mëdha me lëngje mund të vendosen së shpejti në të gjithë BE-në, që do të thotë se pasagjerët nuk do të kenë më nevojë të sigurohen që të mos bartin shishe që përmbajnë më shumë se 100 ml kur udhëtojnë.
Komisioni Evropian konfirmoi për Euronews se ndryshimi, i raportuar për herë të parë nga gazeta italiane Il Corriere della Sera, është në proces, transmeton klankosova.tv.
Sipas rregullave aktuale të BE-së, lëngjet, aerosolet dhe xhelat (LAG) të përfshira në bagazhet e dorës duhet të paketohen përgjithësisht në enë që nuk mbajnë më shumë se 100 ml, megjithëse bëhen përjashtime për dietat speciale, produktet për foshnje dhe ilaçet, sepse pajisjet tradicionale të sigurisë, si makinat me rreze X, nuk mund të zbulojnë në mënyrë efektive eksplozivët e lëngshëm.
Por sisteme të reja zbulimi eksplozivësh janë tani në dispozicion për bagazhet e kabinës, dhe këto tani janë instaluar në disa aeroporte të BE-së – si në Romë dhe Milano – të cilat do t’u mundësonin pasagjerëve të mbanin enë më të mëdha me lëngje në bord.
Megjithatë, për arsye teknike, Komisioni Evropian vendosi një kufizim të përkohshëm në sistemet e reja të zbulimit të lëngjeve verën e kaluar, që do të thotë se rregulli prej 100 ml mbeti në fuqi.
