Presidenti i Federatës së Futbollit të Kosovës, Agim Ademi, ka marrë pjesë në ceremoninë e shortit të Ligës së Kampionëve që po mbahet sot në Monaco, së bashku me Presidentin e FSHF-së, Armand Duka.
Përmes një postimi në rrjetet sociale, Ademi ka shprehur kënaqësinë për të qenë pjesë e një ngjarjeje të tillë madhështore që, siç tha ai, bashkon klubet më të mira të Evropës, raporton lajmi.net
“Sot ndodhem në Monaco, ku po mbahet shorti i Ligës së Kampionëve, së bashku me mikun tim, Armand Duka. Është gjithmonë kënaqësi të jesh pjesë e një eventi kaq madhështor që bashkon klubet më të mira të Evropës,” shkroi Ademi.
Ai gjithashtu u shpreh krenar për përparimin e klubeve shqiptare në garat evropiane dhe shprehu dëshirën që në të ardhmen e afërt të shihen edhe ekipet nga Kosova në fazën e grupeve të Ligës së Kampionëve.
“Jemi krenarë që klubet tona po tregojnë rritje të vazhdueshme të performancës në garat evropiane. Uroj që në të ardhmen e afërt të shohim edhe ekipet nga Kosova në fazën e ligës në garën elitare të futbollit evropian,” përfundoi Ademi./Lajmi.net/
