Lideri i Aleancës për Ardhmërinë e Kosovës, Ramush Haradinaj në konferencën e përbashkët me liderin e partisë Nisma për Kosovën, Fatmir Limajn janë shprehur këmbëngulës në kërkesat e tyre dhe për zgjedhjet e jashtëzakonshme.
Në këtë konferencë për gazetarë, ata folën edhe për protestën e 14 majit, të cilën e quajtën si një mbështetje të qytetarëve në kauzën e tyre.
Numri një i AAK-së tha se dy temat që po e rëndojnë Kosovën më së shumti janë ndërhyrja e Serbisë dhe keqqeverisja.
Ndërsa, lidhur me Asociacionin e Komunave me shumicë serbe, sipas liderëve të këtyre dy partive, kanë thënë se kjo çështje duhet të rinegociohet, pasi gjykata Kushtetuese e ka gjetur shkalje, duke ndryshuar kështu qëndrim nga koha kur koalicionin opozitar ishte edhe Lëvizja Vetëvendosje, kur ishin kategorikisht kundër këtij asociacioni.
“Janë dy tema që e rëndojnë Kosovën, ndërhyrja e Serbisë në Kosovë dhe keqqeverisja. Protesta e 14 majit dëshmoi mbështetjen e qytetare kundër këtyre dy gjërave”, ka thënë Haradinaj, raporton lajmi.net.
Në takimin me komisionerin e BE-së, Johannes Hahn, ai tha se ka propozuar që marrëveshja për Demarkacionin të negociohet në Bruksel, por se nuk ka marr ndonjë përgjigje lidhur me këtë propozim.
Ndërsa, kreu i Nismës për Kosovën, Fatmir Limaj, ka insistuar se zgjidhja më e mirë të gjitha problemeve, vazhdon të jetë organizimi i zgjedhjeve të jashtëzakonshme.
“Do të vazhdojmë kundërshtimin e kësaj qeverie dhe jemi duke punuar që të shpalosim alternativat tona. Ne mendojmë se e vetmja zgjidhje për të dal nga kriza janë zgjedhjet e jashtëzakonshme”, ka thënë Limaj.
