Një person është arrestuar në Prishtinë nën dyshimin se ka dëmtuar dhe humbur qëllimisht byzylykun elektronik, i cili i ishte vendosur në bazë të një urdhri të gjykatës.
Sipas raportit 24-orësh të Policisë së Kosovës, rasti ka ndodhur më 25 qershor 2026, rreth orës 15:00.
Policia njofton se i dyshuari, shtetas i Kosovës, dyshohet se ka dëmtuar dhe më pas ka humbur pajisjen elektronike të mbikëqyrjes, të cilën ishte i obliguar ta mbante sipas një vendimi gjyqësor.
“Është arrestuar i dyshuari mashkull kosovar, pasi që qëllimisht kishte dëmtuar dhe humbur byzylykun elektronik të vendosur me urdhër të Gjykatës”, thuhet në raportin e Policisë së Kosovës.
Me vendim të prokurorit kompetent, i dyshuari është dërguar në mbajtje, ndërsa rasti është duke u trajtuar nga organet përgjegjëse.
