Massimiliano Allegri është i gatshëm të vazhdojë te Milani edhe përtej këtij sezoni, por ka vendosur kushte të qarta për qëndrimin e tij, duke kërkuar investime të rëndësishme në merkato dhe fund të përplasjeve të brendshme që kanë dëmtuar pozitën e tij gjatë sezonit.
Sipas raportimeve të “MilanNews”, kontrata e Allegrit përfshin një klauzolë që do ta zgjaste automatikisht marrëveshjen deri në qershor 2028 me rreth 6 milionë euro neto në sezon, në rast se Milani siguron kualifikimin në Ligën e Kampionëve në javën e fundit të sezonit.
Megjithatë, zgjatja e kontratës është vetëm një pjesë e çështjes. Allegri kërkon garanci në dy drejtime përpara se të angazhohet për të ardhmen e tij në klub.
Kërkesa e parë është një merkato e verës me investime të mëdha. Me rikthimin në garat evropiane, skuadra aktuale e Milanit me rreth 19 lojtarë të fushës konsiderohet e pamjaftueshme.
Allegri kërkon që grupi të zgjerohet në të paktën 25 lojtarë, me përzierje lojtarësh me përvojë dhe talente të rinj të përshtatshëm për stilin e tij.
Trajneri ka theksuar se dëshiron të ketë ndikim real në vendimet e merkatos dhe që kërkesat e tij të respektohen. Nëse ai kërkon një sulmues qendre, ai pret që klubi ta sjellë atë.
Kërkesa e dytë ka të bëjë me qartësinë e rolit brenda organizatës. Konfliktet e brendshme dhe ndërhyrjet e paautorizuara në merkato që kanë karakterizuar këtë sezon duhet të ndalen.
Allegri thuhet se ka qenë shumë i qartë në këtë pikë, ndërsa pronari Gerry Cardinale raportohet se ka reaguar pozitivisht, duke e mbështetur publikisht punën e trajnerit në një intervistë të fundit. Një takim përfundimtar mes palëve pritet të zhvillohet pas përfundimit të sezonit./GazetaExpress/
