Kryetari i Lidhja Demokratike e Kosovës, Lumir Abdixhiku, ka vizituar sot stërvitjet e KF Prishtina, duke vlerësuar rolin që sporti dhe futbolli kanë në edukimin dhe zhvillimin e të rinjve në Kosovë.
Përmes një postimi publik, Abdixhiku theksoi se klubi kryeqytetas përfaqëson “pasionin, përkushtimin dhe ëndrrat e brezave të tërë”, ndërsa nënvizoi se sporti është shumë më tepër sesa një lojë, shkruan IndeksOnline.
Postimi i plotë:
Një mëngjes me djemtë e Kryeqytetit.
I përcolla sot stërvitjet e KF Prishtinës, klubit që përfaqëson pasionin, përkushtimin dhe ëndrrat e brezave të tërë.
Sporti, futbolli, janë shumë më tepër se lojë. Janë disiplinë, karakter, sakrificë e shpirt gare. Janë vendi ku të rinjtë mësojnë të besojnë tek vetja, tek ekipi dhe tek qyteti që përfaqësojnë.
Por talenti i të rinjve tanë nuk mjafton pa mbështetje reale. Kosovës i duhen më shumë fusha sportive, stadiume funksionale, akademi moderne, kushte dinjitoze për stërvitje dhe më shumë përkrahje institucionale për klubet e sportistët tanë.
Sporti e futbolli, janë investime në rininë tonë. Investim në shëndet, edukim, disiplinë dhe krenari qytetare. Kur një i ri hyn në fushë sportive, ai shndërrohet në aset. Kur një klub mbështetet, një qytet merr frymë më ndryshe. E kur sporti ngritet, ngrihet edhe vetë shoqëria jonë.
