Afrobeats – termi ombrellë për një sërë zhanresh moderne të muzikës vallëzuese nga Afrika Perëndimore – po përballet me një periudhë të paqartë pas një dekade suksesi global që dukej i pandalshëm.
Në vitin 2016, zhanri nisi të depërtojë në skenën ndërkombëtare të popit, i shtyrë nga bashkëpunime si ai mes Wizkid dhe Drake me “Come Closer”. Në atë kohë, studenti Olabode Otolorin shkruante me entuziazëm për potencialin e Afrobeats. Sot, si pjesë e labelit Mavin Records, ai pranon një realitet më të zymtë: “Gjendja e eksporteve tona është delikate.”
Të njëjtin shqetësim e ndan edhe këngëtari Omah Lay, i cili gjatë një eventi në Lagos pranoi hapur se “Afrobeats po bie në tregjet ndërkombëtare”. Sipas tij, tingulli që dominonte mes viteve 2020–2024 nuk ka më të njëjtën fuqi.
Nga ana tjetër, disa artistë më të rinj mbeten optimistë, ndërsa të tjerë, sipas gazetarit Melody Ifeanyi Adigo, “thjesht po përpiqen të mbijetojnë në këtë periudhë të vështirë”.
Kulmi i Afrobeats erdhi pas pandemisë, sidomos në vitet 2021–2023, kur këngë si “Essence” e Wizkid, “Love Nwantiti” e CKay, “Last Last” e Burna Boy dhe “Calm Down” e Rema dominuan platformat globale dhe rrjetet sociale. Në atë periudhë, zhanri dukej i pakonkurrueshëm.
Por sipas artistit Joeboy, ndikimi i tij nuk ishte vetëm ekonomik: “Afrobeats e bëri botën të interesuar për kulturën tonë, mënyrën si jetojmë dhe si vishemi.”
Sot, megjithatë, tabloja është më e ftohtë. Shumë artistë raportojnë rënie të buxheteve të marketingut, më pak turne ndërkombëtare dhe mungesë të hiteve në top-lista amerikane pas suksesit të “Calm Down”. Edhe bashkëpunimet me artistë të huaj nuk po japin më efektin e dikurshëm.
Sipas ekspertëve të industrisë, një nga arsyet është edhe ndryshimi i sjelljes së tregut global dhe zhvendosja e vëmendjes drejt zhanreve të tjera. Të tjerë theksojnë se periudha e shpërthimit të Afrobeats ishte ndihmuar edhe nga pandemia dhe rritja e diasporës afrikane në Perëndim, faktorë që tashmë janë dobësuar.
Në aspektin muzikor, zhanri po kalon gjithashtu një fazë eksperimentimi, duke u larguar nga ndikimi i amapiano-s dhe duke kërkuar tinguj të rinj. Kjo ka sjellë fragmentim dhe pasiguri në industrinë muzikore.
Pavarësisht kësaj, shumë brenda skenës nuk flasin për rënie, por për riorganizim. Artistë të rinj nga skena underground po fitojnë vëmendje, ndërsa festivalet në Lagos po u japin hapësirë emrave të rinj përkrah yjeve të njohur.
Sipas disa drejtuesve të industrisë, Afrobeats nuk po zhduket, por po hyn në një fazë rishpikjeje. Siç shprehet një prej tyre: “Po rikthehemi te baza. Dhe nga aty, gjithçka mund të fillojë sërish.” /GazetaExpress/
