Zvicra mund të përballet me mungesë të karburantit për avionë pikërisht në prag të sezonit të udhëtimeve verore, përcjell albinfo.ch.
Aeroportet në vend po përballen me vështirësi në furnizim me karburant, situatë e cila është përkeqësuar nga mbyllja e vazhdueshme e Strait of Hormuz, një rrugë kyçe për transportin e naftës nga Lindja e Mesme.
Sipas të dhënave aktuale, rezervat e detyrueshme të kerosenit në Zvicër janë të mjaftueshme vetëm për rreth 2.4 muaj. Nëse situata nuk përmirësohet, në skenarin më të keq mund të ketë mungesë karburanti në aeroportet zvicerane që nga mesi i muajit korrik, pikërisht gjatë periudhës së pushimeve verore.
Megjithatë, ende nuk është e qartë se në çfarë mase kjo situatë mund të ndikojë në kompanitë ajrore që operojnë në Zvicër.
Zëdhënësja e kompanisë ajrore Swiss International Air Lines, Meike Fuhlrott, ka deklaruar për media se aktualisht operimet po zhvillohen normalisht dhe pasagjerët mund të udhëtojnë sipas planeve.
“Deri më tani gjithçka po funksionon pa probleme dhe udhëtarët tanë po realizojnë udhëtimet e planifikuara”, tha ajo, duke shtuar se situata mbetet e pasigurt.
Sipas saj, zhvillimet e fundit tregojnë se gjendja mund të ndryshojë shumë shpejt, ndaj autoritetet dhe kompanitë ajrore po e monitorojnë nga afër situatën e furnizimit me karburant.
