Të martën, Barcelona dhe Newcastle United përballen në “St James’ Park” në ndeshjen e parë të raundit të 1/8-es së Ligës së Kampionëve.
Katalanasit janë favoritë të mëdhenj për të kaluar në çerekfinale, edhe pse do të përballen me një skuadër që ka gjithçka në lojë.
Ka qenë një sezon i vështirë për Newcastlen, të cilët u eliminuan nga FA Cup të shtunën nga Manchester City.
Ata po hasin vështirësi edhe në Premierligë, që do të thotë se Liga e Kampionëve mund të jetë e vetmja shpresë në një sezon të dobët.
Trajneri Eddie Howe e sheh kështu, teksa foli për ndeshjen pas humbjes ndaj Man City, sipas “Sport”: “Ne kemi ndeshjen më të madhe në historinë tonë në një kohë shumë të shkurtër. Nuk kemi qenë kurrë në këtë pozicion në Ligën e Kampionëve, dhe është kompeticioni më i mirë që ekziston”.
Barcelona nuk do të përballet vetëm me lojtarët e Newcastlet të martën, por edhe me tifozët e tyre.
“St James’ Park” është një stadium i njohur si shumë i vështirë për çdo ekip mysafir, dhe Howe dëshiron që tifozët të jenë “lojtar i 12-të”.
“Ne kemi nevojë që tifozët të ndiejnë si ne. Duhet të gjejmë energjinë për të ngritur performancën tonë në një nivel që ndoshta nuk e kemi parë këtë sezon, sepse vetëm atëherë mund të kalojmë këtë përballje”, shtoi ai.
Do të jetë një provë shumë e vështirë për Barcelonën të martën, veçanërisht pasi do të jenë pa mbrojtësit titullarë Jules Kounde dhe Alejandro Balde.
Megjithatë, ata mund të mbështeten te fitorja 2-1 në “St James’ Park” gjatë fazës së ligës në shtator, dhe këtë herë do të kenë në dispozicion edhe Lamine Yamal./GazetaExpress/
