Ish-aktorja Jessica Mann ka dëshmuar sërish në një gjykatë në Manhattan kundër producentit të njohur hollywoodian Harvey Weinstein, duke rrëfyer mes lotësh pretendime për abuzim seksual që datojnë nga viti 2013, shkruan New York Post.
Gjatë dëshmisë së saj, Mann tha se Weinstein dyshohet se u përpoq ta detyronte të merrte pjesë në një marrëdhënie seksuale në treshe dhe më pas e dhunoi seksualisht në një dhomë hoteli në Midtown Manhattan, në hotelin Doubletree, më 18 mars 2013. Ajo e përshkroi momentin si traumatik, duke deklaruar se ai e kishte mbajtur të shtrënguar në shtrat dhe se ajo kishte kundërshtuar vazhdimisht.
“Vazhdimisht po thosha ‘Jo’ dhe po përpiqesha të largohesha”, u shpreh ajo para jurisë, duke demonstruar edhe mënyrën se si, sipas saj, Weinstein ia mbante duart mbi kokë. Ajo shtoi se ishte ndjerë e trajtuar “sikur të ishte pronë e tij”.
Mann dëshmoi gjithashtu për një tjetër incident të pretenduar më vonë gjatë të njëjtit vit, duke thënë se kishte humbur ndjenjat gjatë aktit për shkak të peshës së tij.
Ajo tregoi se e kishte njohur Weinstein në Los Angeles kur ishte 27 vjeçe dhe në fillimet e karrierës së saj si aktore. Sipas saj, marrëdhënia mes tyre kishte filluar me elementë pëlqimi, por më pas ishte shndërruar në presion dhe abuzim.
Në dëshminë e saj, Mann foli edhe për ndikimin dhe fuqinë e Weinstein në industrinë e filmit, duke thënë se ai shpesh përmendte lidhjet e tij me figura të fuqishme dhe krijonte frikë përmes statusit të tij.
Weinstein është deklaruar i pafajshëm për akuzat që lidhen me këtë rast. Ai aktualisht ndodhet në burg duke vuajtur një dënim të mëparshëm për dhunë seksuale në Kaliforni dhe përballet me procese të tjera gjyqësore në Nju Jork.
