Seriali britanik i konspiracionit teknologjik The Capture rikthehet me sezonin e tretë, duke e çuar edhe më tej paranojën mbi inteligjencën artificiale, manipulimin e imazheve dhe luftën kibernetike.
Në qendër është sërish aktorja Holliday Grainger, e cila thotë se roli i saj e ka bërë më skeptike ndaj realitetit që na rrethon.
Sezoni i ri hapet me një skenë tronditëse në Terminalin 5 të Heathrow: një agjent rus manipulon kamerat CCTV dhe përdor teknologji “deepfake” për të kaluar kontrollet kufitare.
Seriali, i krijuar nga Ben Chanan, ndërthur përdorimin shtetëror të AI-së, sulmet kibernetike dhe dezinformimin – duke krijuar një atmosferë që Grainger e përshkruan si “një version i zgjatur i Black Mirror”.
Aktorja 37-vjeçare thotë se zhvillimet reale teknologjike po ecin me një ritëm që e bën fiction-in të duket gjithnjë e më pak i ekzagjeruar. “Kur doli sezoni i parë, disa menduan se ishte i tepruar. Sot, jo më,” shprehet ajo. Sipas saj, problemi nuk është vetëm fuqia e inteligjencës artificiale, por mungesa e rregullave dhe shpejtësia me të cilën përhapet dezinformimi në rrjete sociale.
Grainger pranon se seriali i ka ndryshuar mënyrën si e ndjek lajmin: është bërë më dyshuese dhe më e ndërgjegjshme për manipulimin e mundshëm të informacionit. Ajo shpreh shqetësim edhe për ndikimin e AI-së në industrinë krijuese, duke përmendur raste kur aktorë kanë refuzuar kontrata që u kërkonin të hiqnin dorë nga të drejtat mbi përdorimin digjital të imazhit të tyre.
Në sezonin e ri, personazhi i saj, DCI Rachel Carey, drejton Njësinë Kundër Terrorizmit të Policisë Metropolitane. Për këtë rol, Grainger ka ndjekur trajnim me armë zjarri për dy ditë. “Mësova ndryshimet mes mënyrës si i mbajnë armët ushtarakët dhe policia. Tani jam plotësisht e përgatitur për të ardhmen tonë distopike,” thotë me humor.
Ajo realizon vetë shumicën e skenave fizike – vrapime, ndjekje, përplasje – dhe pranon se i pëlqen dinamika e aksionit në një serial që përndryshe është shumë cerebral.
E njohur edhe për rolin e Robin Ellacott në serialin Strike, bazuar në romanet e J. K. Rowling (me pseudonimin Robert Galbraith), Grainger thotë se karriera e saj ka kaluar nëpër faza: nga role historike me kostume të rënda, tek epoka aktuale e detektives.
Pavarësisht toneve të errëta të “The Capture”, ajo mbetet realiste për ndryshimet shoqërore. “Institucionet e mëdha nuk transformohen brenda natës,” thekson ajo. “Ndryshimi është proces i gjatë.”
Ndërkohë, seriali vazhdon të pasqyrojë tema aktuale – nga kërcënimet ruse tek manipulimi mediatik – duke e bërë vijën mes realitetit dhe trillimit gjithnjë e më të paqartë. /GazetaExpress/
