Reshjet e dendura të shiut gjatë mbrëmjes së kaluar kanë shkaktuar përmbytje dhe dëme të konsiderueshme materiale në Komunën e Skenderajt. Sipas autoriteteve komunale, situata ka qenë e rënduar në disa zona, ndërsa infrastruktura është dëmtuar ndjeshëm, shkruan Drenica Press.
Shefi i kabinetit të kryetarit të Skenderajt, Amir Lushtaku, ka bërë të ditur gjatë ditës së sotme se vërshimet e mbrëmshme kanë shkaktuar dëme të mëdha materiale, por për fat të mirë nuk ka pasur humbje të jetëve të njerëzve.
Ai theksoi se vetëm në fshatin Llaushë janë tri ura jashtë funksionit si pasojë e vërshimeve, duke vështirësuar qarkullimin dhe lëvizjen e banorëve. Sipas tij, ekipet komunale janë në terren dhe po vlerësojnë situatën, ndërsa po merren masat e nevojshme për tejkalimin e gjendjes dhe rikthimin e normalitetit.
Përmbytjet në Skenderaj shkaktojnë dëme të mëdha materiale, tri ura jashtë funksioni në Llaushë
- Advertisement -
