Rezultati i zgjedhjeve të 28 dhjetorit 2025 ka vendosur Lidhjen Demokratike të Kosovës dhe udhëheqjen e saj në qendër të kritikave, teksa pakënaqësitë po shfaqen publikisht edhe nga anëtarë dhe ish-anëtarë të partisë.
Ish-deputeti i LDK-së, Blerim Grainca, ka reaguar duke kërkuar ndryshim dhe unifikim urgjent brenda partisë, duke theksuar se zhvillimet e brendshme po pengojnë reformimin e saj.
“LDK-ja ka nevojë urgjente të ndryshojë dhe të unifikohet”, ka deklaruar Grainca, duke akuzuar një grup mashtruesish, sorosistësh dhe humbës të tri palë zgjedhjeve, si dhe shërbëtorët e partive të tjera brenda LDK-së që, sipas tij, po pengojnë ndryshimin.
Ai ka shtuar se LDK-ja nuk mund të dorëzohet para krimit dhe ka bërë thirrje për veprim të menjëhershëm politik brenda partisë.
Ndërkohë, debatet brenda LDK-së vazhdojnë të ashpërsohen. Kandidatja për deputete, Shqipe Pantina, kritikoi udhëheqjen e partisë, duke thënë se fokusi i LDK-së mbi opozitën ndaj Qeverisë Kurti ka lënë pas dore ofrimin e një alternative konkrete për qytetarët. Ajo gjithashtu vuri në dyshim reformën e nisur nga kryetari Lumir Abdixhiku, duke e quajtur “të lënë në gjysmë” dhe duke kritikuar vendimet për pozicionimin e individëve pa përvojë politike, që sipas saj kanë krijuar rezistencë brenda partisë.
Komentet e Pantinës shkaktuan reagime nga brenda radhëve të LDK-së, ku kandidati për deputet, Sokol Havolli, e sulmoi atë duke thënë se kritikat e saj reflektojnë dështime politike personale dhe janë goditje pas shpine ndaj partisë. /Lajmi.net/
