Analisti Shenoll Muharremi është shprehur i shokuar që ekzistojnë 400 mijë persona në Kosovë që kanë të ardhura vetëm pesë euro në ditë.
Ai deklaroi se nuk po i largohet nga mendja, se si në vitin 2025 hiç më pak se 90.000 familje janë të cenuara, e rreth 400.000 persona, qytetarë të Kosovës janë të cenuar financiarisht, e të njëjtit kanë të ardhura vetëm 5 euro në ditë, apo 150 euro në muaj.
“Dmth pesë euro për person me u ushqy, me u ngrohë dimrit, për edukim, shëndetësi e ilaqe… për transport, dhe për me pagu tatime të larta.. e gjithcka tjetër që nevojitet për me jetu.Ky grup, diku rreth 389,262 kosovarë, i ka të ardhurat sa për me ble 3 bureka në ditë edhe një ujë, kurgjo tjetër!As nuk munden me u ushqy si duhet me 5 euro, e as nuk munden me u shkollu, me u trajtu shëndetësisht apo me ble ilaqe”,deklaroi Sheholli, transmeton lajmi.net.
Ai shtoi po ashtu se nëse ky është drejtimi i “duhur” ekonomik që e dëshiron Kosova, me u thellu varfëria për 77,849 persona brenda një viti, me u rritë nga 19.4% në 24.55% atëherë kjo nuk është më thjesht varfëri.
“Kjo është zgjedhje politike, jo mungesë e resurseve apo potencialit ekonomik.Mendoni mirë si votoni me 28 dhjetor dhe përdorni faktet e jo budallakinë e inatet. Votoni për të ardhme më të sigurt dhe dinjitetshme ku njerëzit munden me jetu dhe me rritë familje pa u cenuar kaq shumë!”./Lajmi.net/
