Komuna e Skenderajt është zhytur sot në zi, pas lajmit për ndarjen nga jeta të dy mësuesve të nderuar që lanë gjurmë të pashlyeshme në edukimin e shumë brezave: Osman Jakupi, mësues në shkollën e fshatit Qirez, dhe Sherife Abazi-Ajeti, mësuese në shkollat “Shaban Jashari” dhe “Ahmet Delia”.
Osman Jakupi kujtohet si një personalitet i qetë, human dhe i përkushtuar, i cili ia kushtoi jetën arsimit dhe formimit të nxënësve. Me profesionalizëm dhe devotshmëri, ai ndërtoi një trashëgimi të çmuar që do të kujtohet me respekt e mirënjohje nga të gjithë, përcjellë Drenica Press.
Sherife Abazi-Ajeti, një figurë e çmuar e arsimit shqip, me dekada punë të palodhshme, la pas një ndikim të madh te gjenerata të tëra nxënësish. Ajo u shqua për përkushtimin, urtësinë dhe dashurinë për misionin e mësimdhënies.
Ikja e tyre përbën një humbje të madhe për arsimin, komunitetin dhe për të gjithë ata që patën fatin t’i njohin e t’i respektojnë.
Qoftë i përjetshëm kujtimi për ta!
U prehshin në paqe!/DRENICAPRESS/
