Kandidati për kryetar të Vushtrrisë, Ferit Idrizi, ka shprehur mirënjohjen e tij për energjinë dhe përkrahjen e jashtëzakonshme që ka marrë nga banorët e fshatit Stanoc i Poshtëm. Gjatë një takimi me kandidatët për Kuvendin e Komunës, përfshirë Rrahim Ajetin, banorët pritën ekipin e Idrizit me entuziazëm dhe mbështetje të madhe.
Idrizi theksoi se kjo mbështetje e vazhdueshme gjatë mandatit të parë e bën ekipin e tij më të fortë dhe krenar për punën e bërë deri tani. Ai premtoi se në mandatin e ardhshëm, Stanoci i Poshtëm do të përfitojë nga investime të rëndësishme, përfshirë ndërtimin e një parku modern, çerdhe për fëmijët dhe përmirësimin e infrastrukturës lokale.
“Në mandatin e ardhshëm, Stanoci i Poshtëm do të jetë dëshmia më e mirë e investimeve tona: park modern, çerdhe për më të vegjlit dhe infrastrukturë e rregulluar”, tha ai.
