Pjesëtarët e Forcave të Sigurisë së Kosovës (FSK) kanë zhvilluar një stërvitje taktike me mortaja në zonën e Bizës, në Shqipëri.
Stërvitja është pjesë e planifikimeve të rregullta trajnuese dhe është realizuar në bashkëpunim të ngushtë me Organizatën për Menaxhimin e Trajnimeve dhe Asistencës së Sigurisë së Ushtrisë së SHBA-së (SATMO) dhe me Forcat e Armatosura të Republikës së Shqipërisë, raporton lajmi.net
Në një njoftim zyrtar, FSK ka bërë të ditur se qëllimi i këtij aktiviteti është rritja e gatishmërisë operacionale dhe forcimi i bashkëpunimit me partnerët rajonalë dhe ndërkombëtarë.
“Në përputhje me planet e trajnimit dhe në koordinim të ngushtë me SATMO, si dhe me Forcat e Armatosura të Republikës së Shqipërisë, po realizohet aktiviteti i gjuajtjes taktike me mortaja në stërvitjen që po zhvillohet në Biza, të Republikës së Shqipërisë. Ky aktivitet synon rritjen e gatishmërisë operative, forcimin e bashkëpunimit rajonal mes forcave tona dhe partnerëve ndërkombëtarë”, ka njoftuar FSK.
Stërvitja ka përfshirë komponentët teorikë dhe praktikë, duke trajnuar pjesëtarët e FSK-së në teknikat dhe përdorimin efektiv të mortajave në kushte taktike të terrenit malor.
Kjo është një nga seritë e trajnimeve të përbashkëta që FSK zhvillon në kuadër të bashkëpunimit ushtarak me vendet partnere të NATO-s dhe rajonit.
Postimi i plotë:
FSK është duke ngritur kapacitetet operacionale me ndihmën e partnerëve
Forca e Sigurisë së Kosovës (FSK), me mbështetjen e Organizatës për Menaxhimin e Trajnimeve dhe Asistencës së Sigurisë të Ushtrisë së Shteteve të Bashkuara të Amerikës (SATMO), vijon përpjekjet e saj për avancimin dhe ngritjen e kapaciteteve operacionale dhe mbështetjes luftarake të personelit ushtarak.
Në përputhje me planet e trajnimit dhe në koordinim të ngushtë me SATMO, si dhe me Forcat e Armatosura të Republikës së Shqipërisë, po realizohet aktiviteti i gjuajtjes taktike me mortaja në stërvitjen që po zhvillohet në Biza, të Republikës së Shqipërisë. Ky aktivitet synon rritjen e gatishmërisë operative, forcimin e bashkëpunimit rajonal mes forcave tona dhe partnerëve ndërkombëtarë.
Trajnimi është realizuar në pjesën teorike dhe praktike i fokusuar në tri detyra kryesore: Trajnimi me mortaja (Mortar training), Kursi për udhëheqës të këmbësorisë dhe Mortajave (Infantry mortar leader course), Vëzhgues i përparmë (Forward observer) ku janë stërvitur në: Përdorimin e sigurtë të mortajave, shënjestrimi, gjuajtja, stërvitje e procedurave të koordinimit dhe komunikimit midis elementeve të zjarrit dhe njësive taktike, shkëmbim të përvojave dhe praktikave më të mira me trajnerët dhe këshilltarët e partnerëve ndërkombëtarë etj.
Ky bashkëpunim forcon kapacitetet profesionale të FSK-së dhe kontribuon në sigurinë dhe stabilitetin rajonal përmes trajnimit të sinkronizuar dhe bashkëpunimit të vazhdueshëm me partnerët tanë./Lajmi.net/
