Si pasojë e sulmeve ruse në Ukrainë është destabilizuar edhe tregu i naftës ku rritja e çmimit të derivateve në botë, pritet që drejtpërdrejt të rrisë edhe çmimet e produkteve tjera, raporton GazetaBlic.
Ditëve të fundit në Kosovë është shënuar rritje rekorde e çmimit të naftës, kështu duke filluar nga 1.75 cent.
Madje në disa pika karburanti, çmimi i naftës shkonte deri në 1.82 cent.
Por sot, kryetari i Shoqatës së Naftëtarëve të Kosovës, Fadil Berjani ka thënë se ka rënie të çmimit të naftës.
Ai për GazetaBlic u shpreh se ka rënie të theksuar të çmimit të derivateve.
“Nga 1.82 cent tani çmimi është 1.50 dhe kjo do të thotë që çmimi i derivateve është në rënie”, u shpreh Berjani.
Në anën tjetër, Komuna e Prishtinës ka vendosur çmimoren e re për auto-taksitë, sipas të cilës tarifa për nisje nga 1.50 euro bëhet 2.00 euro.Lidhur me këtë lajm, Berjani u shpreh se kur çmimet e derivateve janë në rënie e sipër nuk ka kurrëfarë arsye të rritet tarifa për nisje te auto-taksitë.
“Kur derivatet janë në rënie, nuk ka arsye të rritet tarifa në taksi por çdo kompani e përcakton çmimin e vet”, tha Berjani për GazetaBlic.
