Kryetari i Lëvizjes Vetëvendosje ka prezantuar sot një kandidat që do të jetë pjesë e listës së Vetëvendosjes për deputet. Fatmir Rashiti, Kreu i Iniciativës Qytetare të Shtimes, i cili ishte pjesë e PDK-së iu bashkua Lëvizjes Vetëvendosje, njofton Gazeta Blic.
“Fatmir Rashiti është i vendosur të mos ndalet në betejën kundër kapjes së shtetit, krizës ekonomike dhe mjerimit social. Prandaj na u bashkua në listën e Lëvizjes”, ka thënë Kurti në një postim në Facebook.
Postimi i plotë:
“Kreu i Iniciativës Qytetare të Shtimes, Fatmir Rashiti, është pjesë e listës së VETËVENDOSJE!-s për zgjedhjet e 6 tetorit.
Ai ka mbaruar shkollimin e lartë në vitin 1979 dhe ka punuar në arsim deri në vitin 1999. Në vitin 1999 u emërua drejtor i shkollës fillore “Bajram Curri” në vendlindje në Petrovë, ku qëndroi deri në vitin 2002, kur asokohe u emërua nënkryetar i komunës së Shtimes.
Në zgjedhjet komunale të vitit 2007, me lista të hapura, ka qenë kandidati më i votuar në PDK. Nga viti 2004 deri më 2007 ka qenë kryetar i Kuvendit Komunal të Shtimes, ndërkaq nga viti 2007 deri në vitin 2017 për tri mandate rresht nënkryetar i komunës së Shtimes. Mirëpo, mandatin e fundit nuk e përfundoi pasi që dha dorëheqje nga PDK-ja për shkak të keqqeverisjes. Si kandidat i pavarur për kryetar komune në zgjedhjet lokale të vjeshtës 2017 shkoi në balotazh ku u përball me makinerinë e PAN-it.
Fatmir Rashiti është i vendosur të mos ndalet në betejën kundër kapjes së shtetit, krizës ekonomike dhe mjerimit social. Prandaj na u bashkua në listën e Lëvizjes.
