Një burrë 65-vjeçar nga Serbia ka thënë në gjykatë se e ka dhënë një alarm të rremë për bombë me qëllim që t’ia pamundësojë largimin nga shteti një stjuardese të kompanisë “Lufthansa”, duke shpresuar që ajo të pranojë të dalë në takim me të.
Njëqind e tridhjetë pasagjerë dhe pesë anëtarë të ekuipazhit u evakuuan nga fluturimi “LH 1411” nga Beogradi në Frankfurt. Aeroplani u largua nga pista në mënyrë që njësia speciale e policisë ta kontrollonte atë.
Një zëdhënës i prokurorisë njoftoi se prokurori ka kërkuar nga gjykata që ta mbajë këtë burrë në paraburgim për shkak se ai pritet të akuzohet për shkaktim të panikut dhe prishje të rendit publik.
Personi i dyshuar tha në gjykatë se ishte takuar me dy stjuardesa dhe se i kishte ftuar ato për darkë, por ato kishin refuzuar. Atij i pëlqeu shumë njëra prej tyre dhe pasi dështoi ta gjente hotelin ku po qëndronte stjuardesa, ai e bëri edhe një përpjekje për të qëndruar afër saj duke bërë një telefonatë dhe duke dhënë alarm të rremë për bombë në aeroplan.
Policia e gjeti prejardhjen e thirrjes dhe e arrestoi burrin një ditë më vonë, shkruan “Reuters”, transmeton Gazeta Express.
