Kryetari i Komunës së Skenderajt, Bekim Jashari, nënkryetari Nuredin Lushtaku, zëvendësministri Abdyl Ymeri dhe kryetari i Drenasit, Ramiz Lladrovci, janë pritur në një takim në selinë e Organizatës së Veteranëve të Luftës së Ushtrisë Çlirimtare të Kosovës, në Prishtinë, ku është diskutuar për zhvillimet në vend.
Kryetari Jashari, pas takimit, është shprehur:
“Organizata e Veteranëve të Luftës është një nga pasuritë tona të përbashkëta si element i çmuar që është trashëguar nga Ushtria Çlirimtare e Kosovës.
Mbi këto vlera kjo organizatë duhet të qëndrojë e palëkundur në përkrahje të vlerave të luftës së lavdishme të UÇK-së dhe popullit në përgjithësi, dhe assesi të bie pre e politikës, sidomos asaj ditore, por të vazhdohet mbi misionin fisnik të ruajtjes së trashëgimisë që na e la UÇK-ja, ashtu siç ishte para 20 viteve.
Kjo ishte porosia ime në takimin që kishim me nënkryetarin Nuredin Lushtaku, zëvendësministrin Abdyl Ymeri dhe kryetarin Ramiz Lladrovci, me udhëheqësit e Organizatës së Veteranëve të Luftës, në selinë e saj në Prishtinë”.
