Lajmi për vdekjen e ish-ushtares së UÇK’së, Fetnete Ramosaj, e ka prekur edhe kryeministrin e Republikës së Kosovës, Ramush Haradinajn.
Ish-komandanti i Zonës së Dukagjinit, ka thënë se lajmi për vdekjen e saj është i rëndë.
“I rëndë lajmi për humbjen tënde, Fetnete. Ishe zëri i ushtrisë në luftë, penda e historisë sonë pas luftës. Zë i ndërgjegjes së popullit tonë. Krenar që të njoha, luftuam e punuam bashkë. Lamtumirë!”, ka shkruar Haradinaj, raporton Gazeta Express.
Lajmin për vdekjen e Fetnete Ramosajt i pari e ka dhënë ish-zyrtari i AAK-së, Ernest Luma.
Ai kishte treguar se tashmë e ndjera gjatë kohës së luftës kishte ushtruar profesionin e gazetares dhe kishte qenë zëri i UÇK’së.
“Një jetë në shërbim të lirisë e atdheut. Aktiviste e hershme, gazetare, publiciste, reportere e luftës, luftëtare e lirisë, faktembledhëse e fakteruajtëse, arkiv që ecte i Kosovës dhe i Ushtrisë Çlirimitare tê Kosovës.Jetove pak, por bëre, lé e dhé shumë për Kosovën.Lamtumirë, mikja jonë e mirë, Fetnete Ramosaj! E palodhshmja dhe e pandalshmja e Kosovës, deri në frymën e fundit! “, kishte shkruar Luma./GazetaExpress./
