Deklarimet e zëdhënëses së Komisionit Evropian, Maja Kocijancic, se edhe puna e Trepçës do të jetë pjesë e dialogut të Brukselit ndërmjet Kosovës e Serbisë dhe marrëveshjes gjithëpërfshirëse që do të arrihet ndërmjet këtyre dy shteteve ka nxitur reagime të ashpra në Kosovë.
I pari që ka reaguar ka qenë kryeministri Ramush Haradinaj, i cili ka thënë se deklarime të tilla të BE-së dëshmojnë se e kanë humbur rrugën në oborr.
Ai thotë se është i papranueshëm një qëndrim i tillë dhe se cenon pavarësinë e shtetit të Kosovës, që për qëllim ka ndarjen e Kosovës.
“Reagimi i BE-së kundër miratimit të Statutit të Trepçës nga Kuvendi i Republikës së Kosovës është dëshmi se BE-së i ka humbur rruga në oborr. Deklarata e zëdhënësës së Komisionit Europian, Maja Kocijancic, dhënë mediave serbe, se Trepça duhet të jetë pjesë e Dialogut është qëndrim i papresedan, i papranueshëm dhe, si i tillë cenon sovranitetin e shtetit të Kosovës. Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false që kanë qartazi qëllim ndarjen e Kosovës”, ka shkruar Haradinaj.
Ndërkohë ka qenë këshilltarja e tij, Meliza Haradinaj-Stublla, e cila ka nisur një peticion online, duke thënë se kushdo që hap temat sovrane të Kosovës, është bashkëpjesëmarrës për ndarjen e Kosovës.
Sipas saj ndarja e Kosovës do të nënkuptonte luftë.
