Publicisti dhe shkrimtari i njohur Milazim Krasniqi është përfshirë në debatin e ngjallur së fundmi në vend rreth humanitetit të Halil Kastratit, i cili u bë i njohur për ndihmën që u dha qindra familjeve kosovare.
Deklarata e Krasniqit ka ardhur si reagimi i Flaka Surroit e cila kritikoi Kastratin për “humanizëm fals”.
“Kurrfarë bamirësie nuk është ajo të cilën e përcjellin kamerat dhe kumtesat për shtyp. Është, për më tepër, keqpërdorim i atyre, që për fat të keq, kanë nevojë që dikush t’iu ndihmojë që të mbijetojnë. Nëse bash keni vendosur të ndihmoni, bëjeni qetazi, për ndërgjegje, e jo për reklamë” ka shkruar Surroi.
Por Krasniqi ka thënë se për ta kuptuar veprën e Halil Kastratit, dhe ndihmën ndaj skamnorëve, duhet të jesh në lëkurën e familjeve që nuk kanë pasur kulm mbi krye e që janë bërë me shtëpi, shkruan GazetaBlic.
Krasniqi ka shtuar se e pakta që duhet ta bëjë një njeri para se të kritikoi “Jetimat e Ballkanit” është që të shkosh me ta në ndonjë nga ato familje, kur u kumtohet se do të bëhen me shtëpi dhe kur shtëpia u dhurohet, e të kuptosh se si mjerimi zëvendësohet me gëzim, vuajtja me shpresë.
Duhet të jesh në lëkurën e familjeve që nuk kanë pasur kulm mbi krye e që janë bërë me shtëpi, për ta kuptuar vlerën e angazhimit të Shoqatës “Jetimat e Ballkanit” dhe të Halil Kastratit personalisht. E pakta, duhet të shkosh me ta në ndonjë nga ato familje, kur u kumtohet se do të bëhen me shtëpi dhe kur shtëpia u dhurohet, e të kuptosh se si mjerimi zëvendësohet me gëzim, vuajtja me shpresë. Përtej kësaj, ka veç kundërthënie logjike e hipokrizi. Pse? Sepse ata që kërkojnë transparencë në të gjitha rastet e tjera, këtu kërkojnë mungesë transparence. E dyta, ka njerëz që shesin moral në publik, ndërsa tregojnë mungesë dhembsurie ndaj njerëzve që vuajnë.
