Raportuesi për Serbinë në Parlamentin Evropian, David McAllister, ka thënë se vetëm me pajtimin e Bashkimit Evropian dhe Këshillit të Sigurimit të OKB-së, mund të realizohet ideja për ndryshim të kufijve si zgjidhje përfundimtare ndërmjet Kosovës dhe Serbisë, transmeton Gazeta Express.
Në një intervistë për ‘tanjug’, McAllister ka thënë se të gjithë në Bashkimin Evropian janë në dijeni për idenë e lëvizjes së kufijve.
“ Ne jemi të vetëdijshëm për këtë debat. Sigurisht një zgjidhje e tillë mund të arrihet vetëm nëse pajtohen të dy palët dhe nëse është në përputhje me të drejtën ndërkombëtare. Ndër të tjera për këtë gjë duhet të pajtohen edhe vendet anëtare të Këshillit të Sigurimit të OKB-së dhe BE-së”, ka thënë ai për tanjug, transmeton Gazeta Express.
Ai ka folur edhe për angazhimin e Hashim Thaçit dhe Aleksandër Vuçiqit për të gjetur një zgjidhje të qëndrueshme ndërmjet dy vendeve.
Megjithatë kundër kësaj ideje kanë dalë shtetet perëndimore si Gjermania dhe Britania e Madhe. As Federica Mogherini nuk ka përkrahur një ide të tillë.
Shumë ish-diplomatë të BE-së janë ngritur kundër kësaj ideje duke thënë se një gjë e tillë do të ndezte konflikte të reja në Ballkanin Perëndimor./GazetaExpress/
