Kryetari i Komunës së Skenderajt, Bekim Jashari, në një takim me komandantin e KFOR-it, Salvatore Cuoci, ka hedhur akuza ndaj Kryeministrit Haradinaj e Presidentit Thaçi pasi këta nuk e kanë njoftuar për vizitën që Aleksandër Vucic planifikonte ta zhvillonte në Banjë të Drenicës.
Sipas kreut të Komunës së Skenderajt, ka pas një mungesë të bashkëpunimit dhe koordinimit nga ana e nivelit qendror, i cili nuk e ka njoftuar më kohë kryetarin Jashari për vizitën në fjalë.
Fokus i këtij takimi ishte protesta e së dielës, ku Jashari ka thënë se drenicasit janë çuar në protestë për shkak se e kanë konsideruar fyerje vizitën e Vucicit, para një kërkim faljeje për atë që ka shkaktuar Serbia në luftën e fundit në Kosovë.
“Kryetari Jashari ka thënë se pavarësisht protestës, qytetarët dhe pjesëmarrësit kanë treguar pjekuri dhe qytetari të lartë, pasi e gjithë protesta ka përfunduar në mënyrë të qetë”, thuhet në njoftimin për media.
Edhe komandanti i KFOR-it e ka vlerësuar të qetë protestën e së dielës, dhe pa ndonjë problem.
Gjatë vizitës është diskutuar edhe aspekti i sigurisë në komunën e Skenderajt, ku kryetari Jashari ka thënë se, bazuar në raportet zyrtare të organeve që merren me çështje të sigurisë, komuna e Skenderajt vazhdon të mbetet e qetë, madje edhe në vendbanimet ku jeton komuniteti serb. /Express
