Arsimtari i cili para dy ditësh me shkop prej druri e ka rrahur një nxënës në shkollën fillore “Zhivko Brajkovski” në Butel është suspenduar derisa të mos zbardhet rasti, transmeton Almakos.
“Me 8 maj të vitit 2018, kryetari i Komunës së Butelit, Velimis Smilevski dhe Departamenti për punë publike, janë njoftuar për torturim fizik të një nxënësi nga ana e arsimtarit në shkollën fillore “Zhivko Brajkovski”.
Ndihmës drejtori dhe pedagogu i shkollës menjëherë e kanë informuar prindin e nxënësit dhe e kanë thirrur në shkollë. Është kryer bisedë me nxënësin, prindin dhe arsimtarin. Pas bisedës, prindi e ka dërguar fëmijën në kontroll mjekësor ku është vërtetuar se ka lëndime të dukshme.
Pas kryerjes së kontrollit, me detyrë zyrtare mjeku e ka paraqitur rastin në MPB prej ku i kanë vizituar prindin dhe shkollën për mbledhjen e informacioneve dhe deklarata nga shërbimet dhe personat përgjegjës”, thuan nga Komuna Butel.
MPB vërtetoi se është lënduar një nxënës 13 vjeçar, i cili me shkop është rrahur nga arsimtari i tij. Ashtu si marrim vesh, dhunuesi ka qenë arsimtar i gjuhës dhe letërsisë shqipe.
Nga Komuna shtuan se në pajtim me Ligjin për arsim fillor dhe ligjin për raportet e punës, organi udhëheqës i shkollës fillore ditën e njëjtë ka sjell vendim për suspendimin e arsimtarit deri në vendimin përfundimtar i bazuar në mendimin e komisionit diciplinar.
