Javën e kaluar, një nxënës i klasës së shtatë të shkollës fillore ‘Bekim Sylka’ të Rahovecit, kishte shkuar në klasë bashkë me një shishe me nargjile. Ai ishte vërejtur nga kujdestarja e klasës. Kjo e fundit i ka dhënë vërejtje të miturit si dhe e ka dërguar atë në shtëpi duke i kërkuar që të paraqitet në shkollë me prindin.
Sot, rreth orës 11:00, policia u informua se një fëmijë – nxënës i klasës së shtatë në shkollën fillore “Bekim Sylka” në Rahovec, ishte hedhur nga kati i dytë i shtëpisë së tij.
Këtë e ka konfirmuar Policia Rajonale e Gjakovës në një përgjigje për Express.
“Patrullat policore me të marr informatën fillimisht kanë shkuar në shkollën ku nxënësi në fjalë ka vijuar mësimin aty kanë kontaktuar me drejtorin e kësaj shkolle ku janë informuar se rasti në fjalë kishte ndodhur dje me datë 24.04.2018 rreth orës 11:00 në shtëpinë e nxënësit”, thuhet në përgjigjen e policisë për Express.
Zyrtarët policorë kanë kontaktuar edhe me prindin e fëmijës i cili njofton se gjendja e tij është stabile dhe jashtë rrezikut për jetë.
Policia thotë se që nga momenti që ka pranuar informatën po punon intensivisht në hetimin e rrethanave të krijuara në këtë rast.
