Këshilli Drejtues i Universitetit të Prishtinës në mbledhjen e mbajtur të enjten, duke iu referuar zhvillimeve të fundit lidhur me problemin e ngacmimeve seksuale adresoi disa veprime.
Përmes një kumtese për medie njofton se ka ftuar gjithë personelin dhe studentët, që rastet e pretenduara të çfarëdo lloj ngacmimi t’i referohen Kodit të Etikës, të cilën e kanë paraqitur me nen të caktuar.
Njoftimi i plotë nga Këshilli Drejtues:
1. Këshilli Drejtues duke qenë i përkushtuar për krijimin e një ambienti të denjë dhe të respektueshëm për të gjithë studentët dhe personelin fton të gjitha palët, që rastet e pretenduara të çfarëdo lloji ngacmimi apo diskriminimi t`i referohen nenit 8, pika 3 dhe 4 të Kodit të Etikës 1/751 të datës 19.07. 2013.
2. Këshilli Drejtues obligon Këshillin e Etikës që në kuadër të përgjegjësive të tij rastet e tilla të ngacmimeve dhe diskriminimit t`i adresoj me prioritet të lartë sipas dispozitave të Rregullores së Këshillit Etik.
3. Këshilli Drejtues me mbështetjen e UNDP-së është në proces të hartimit të Planit të Integritetit të Universitetit të Prishtinës, ku kjo problematikë do të ketë trajtimin e veçantë.
“Universiteti i Prishtinës ka rregulloret dhe mekanizmat e vet institucional funksional për adresimin e këtyre çështjeve. Në frymën e transparencës dhe bashkëpunimit Universiteti i Prishtinës është i hapur për organizatat e studentëve dhe shoqërinë civile për parandalimin e kësaj dukurie dhe krijimin e një mjedisi të përshtatshëm për studentët dhe personelin”, përfundon njoftimi. /Telegrafi/
