Një qytetar me emrin Enis Hyseni, ka publikuar një status për Adem Jasharin, i cili ka ngjallur reagime në rrjetet socila.
E pas kësaj, Enis Hyseni ka marrë me qindra mesazhe kërcënuese. Madje edhe me vdekje. Komente të tilla shihen edhe në postimet e tija të fundit.
Insajderi ka kontaktuar me qytetarin dhe ai e ka pranuar se ka marrë mbi 500 mesazhe kërcënuese.
“Kam marrë mbi 500 mesazhe me kërcënime për vdekje…” ka thënë Hyseni.
Sipas tij është e pafalshme dhe kundër çdo rregulli që një figurë kaq e lartë e Qeverisë së Kosovës të bëjë publikimin e statusit të tij.
“Publikimi i një statusi që kam shkruar në profilin tim nga ana e zëvendësministrit është shkelje e të drejtave të mija, dhe e privatësisë”, ka thënë Hyseni.
Madje sipas tij, fjalia që ka shkruar zëvendësministri Koci që “nëse shteti nuk i mbron vlerat, dikush duhet ta bëjë këtë”, sipas Hysenit është thirrje e pastër e tij për ta sulmuar.
“Kjo është një thirrje e pastër që të më sulmojnë për atë që kam shkruar. Si mundet një zëvendësministër të bëjë thirrje të tilla?”, ka thënë ai.
Për Hysenin, opinioni i tij për Adem Jasharin ka qenë një “shprehje e mllefit nga një i ri kosovar që nuk ka mundur të shoh asnjëherë të ardhme këtu”.
“Njerëzit që kanë qenë në pushtet deri tash kanë fyer më shumë se unë Adem Jasharin me mos punën e tyre që ta bëjnë këtë vend më të mirë”, ka thënë ai.
Hyseni ka kërkuar falje atyre që e kanë keqkuptuar opinionin e tij por kjo sipas tij duhet të respektohen opinionet private.
