Shkarkimi i Bekim Haxhiut nga Sami Lushtaku pa paralajmërim në komunën e Skënderajt, ngjallin dyshime se edhe PDK-ja po shkon drejt ndarjes, ashtu si Vetëvendosja së fundmi.
Këtë gjë e konfirmon edhe deputeti i NISMA-s, Milam Zeka, i cili për një prononcim për “Bota sot”, thotë se PDK-ja është moti e përçarë, mirëpo tani po iu dalin në “fushë”, problemet brenda partisë.
“Unë mendoj se PDK-ja do të përçahet, në fakt PDK-ja ka qenë e përçarë, por tash po dalin nëpër “ledinë” përçarjet”- tha Zeka.
Ai thotë se përçarja mes Haxhiut dhe Lushtakut është shumë më serioze se sa që duket, pasi sipas Zekës, “Kamishi” është njeri i Kadri Veselit, ndërsa Lushtaku njeri i Thaçit.
“Përçarja mes “Kamishit” dhe Lushtakut është shumë serioze, d.m.th nuk është përçarje e thjeshtë ashtu siç po duket tani, për arsye se Lushtaku është njeri i Hashim Thaçit, ndërsa “Kamishi” është njeri i Kadri Veselit”,-përfundoi Zeka.
