Ish-deputetja e PDK-së, Xhevahire Izmaku, ka shpenzuar 1,400 euro nga buxheti i Kuvendit të Kosovës në emër të udhëtimit për në Vushtrri. Ajo jeton në Prishtinë.
Në Kuvendin e Kosovës thonë se deputetëve që jetojnë në Prishtinë nuk u paguhen shpenzimet e udhëtimit.
Në një dokument që e ka siguruar KALLXO.com, ish-deputetja e Partisë Demokratike të Kosovës, Xhevahire Izmaku ka shpenzuar 1,400 euro për udhëtim gjatë vitit 2016.
Në një prononcim për KALLXO.com Xhevahire Izmaku e ka pranuar se jeton në Prishtinë dhe vikendeve shkon në qytetin e saj, Vushtrri.
“Prej të hënës deri të premten unë jam në Prishtinë. Prej të premtes deri të hënën jetoj në Vushtrri, për arsye se bazën e kam në Vushtrri. Unë jam nënkryetare e degës së PDK-së në Vushtrri”, tha për KALLXO.com ish-deputetja.
Xhevahire Izmaku është kandidate për deputete e koalicionit PDK-AAK-Nisma për zgjedhjet e 11 qershorit.
Mirëpo, sekretari i Kuvendit të Kosovës, Ismet Krasniqi, përmes postës elektronike ka thënë për KALLXO.com se deputetët nuk paguhen për shpenzimet e udhëtimit nëse ata jetojnë në Prishtinë.
Ai gjithashtu ka thënë se Kuvendi nuk i mbulon shpenzimet atyre deputetëve që udhëtojnë gjatë vikendit për në vendlindje.
Por, Izmaku thotë se si nënkryetare e degës së PDK-së e ka për obligim të shkojë në Vushtrri.
“Aktivitetin politik e kam aty, pushtetin në Vushtrri e ka PDK-ja edhe e kam obligim që 2 herë në javë të jem në komunë me qytetarët, komunikime e takime. Këto shpenzime janë për udhëtimet për në Vushtrri, kjo është e hapur. Unë i kam dy prindërit atje, kam aktivitetin politik, e kam pozitën politike, kjo është”, tha Izmaku për KALLXO.com
KALLXO.com i ka shkruar përsëri sekretarisë së Kuvendit për t’i pyetur se si është e mundur që deputetja Izmaku që jeton në Prishtinë ka përfituar 1,400 euro për shpenzime të udhëtimit edhe pse ajo jeton në Prishtinë.
Mirëpo, sekretari i Kuvendit, Ismet Krasniqi, përmes telefonit tha për KALLXO.com që t’u referohemi përgjigjeve të para.
