Nënkryetari i Komunës së Skenderajt, Fadil Nura, të premten ka pritur në takim ministrin e Punës dhe Mirëqenies Sociale (MPMS), Arban Abrashin.
Temë e takimit ishte bashkëpunimi në fushën e përmirësimit të jetës së qytetarëve dhe shpërndarja e 100 pakove me veshmbathje për 100 familje në nevojë të komunës së Skenderajt.
Nënkryetari Nura e ka falënderuar ministrin Abrashi për vizitën dhe shpërndarjen e pakove ndihmë për familjet me asistencë sociale. Ai është shprehur i gatshëm për bashkëpunim në fushën e përmirësimit të jetës së familjeve me gjendje jo të mirë ekonomike. Ndërsa ministri i MPMS-së, Arban Abrashi, është shprehur i kënaqur me mundësinë që ka pasur kjo ministri për t’i ndihmuar familjen në nevojë, duke përmendur edhe institucionet e tjera, të cilat kanë kontribuar në sigurimin e këtyre pakove që përmbajnë veshmbathje dhe shtrojë e mbulojë.
Duke folur për bashkëpunimin ndër institucional, ministri Abrashi, ka deklaruar se është i gatshëm për të bashkëpunuar me Komunën e Skenderajt në përmirësimit të jetës së qytetarëve, sidomos në fushën e strehimit të familjeve skamnore.
Në këtë takim kanë marrë pjesë edhe kryetari i OVL të UÇK-së, Hysni Gucati dhe përfaqësues të shoqatës “Nënë Tereza”.
Pas takimit nënkryetari Nura dhe ministri Abrashi kanë bërë shpërndarjen e pakove për familjet me asistencë sociale në Qendrën për Punë Sociale në Skenderaj. Përzgjedhja e 100 familjeve përfituese të këtyre ndihmave është bërë nga Ministria e Punës dhe Mirëqenies Sociale dhe Qendra për Punë Sociale në Skenderaj.
- Advertisement -
