Gjatë ditës së sotme është bërë e ditur se Kosova edhe zyrtarisht e ka fituar kodin telefonik +383. Unioni Ndërkombëtar i Telekomunikacionit (ITU) e ka botuar buletinin e vet në të cilin ka sqaruar se Kosovës i është ndarë numri thirrës treshifror +383.
Ndryshe Indeksonline mëson ekskluzivisht nga vetë Drejtori i Përgjithshëm i VALA-s, Agron Mustafa se testet e para të këtij kodi tashmë janë në funksion.
“Testet e para tashmë janë realizuar dhe janë pozitive. Gjithçka pra që ka të bëjë me kodin është në rregull, mund të thuhet se është fillim i mbarë dhe testet janë në përgjithësi në rregull”, ka thënë Mustafa për Indeksonline.
Po ashtu Indeksonline, ka arritur të sigurojë edhe thirrjen e parë me këtë prefiks +383, e cila ka qenë e suksesshme dhe pa asnjë problem gjatë bisedës telefonike.
Ndryshe duhet përkujtuar që kodi telefonik, +383 sot është bërë edhe zyrtar nga (ITU), e që është një ndër hapat më të suksesshëm për shtetin e ri të Kosovës.
Po ashtu duhet bërë e ditur se me vendosjen e kodit të ri të gjithë operatorët e përdorur më parë do të jenë përsëri në funksion, vetëm duke u ndryshuar kodi i hyrjes telefonike.
