Derisa po shkonte për ta vizituar një të afërm në Qendrën e Pulmologjisë në QKUK, një vizitor deshi ta përdorë liftin.
Por, kur e hapi derën për të hyrë në të, ra disa metra poshtë, pasi që lifti ishte jashtë funksionit.
“Lajmi.net” merr vesh se qytetari ka pësuar lëndime trupore dhe menjëherë ka marrë trajtimin mjekësor në Qendrën emergjente.
Zyrtarja për informim në QKUK, Mirlinda Qyqalla, e ka konfirmuar lajmin.
Ajo ka thënë se vizitori e ka hapur derën me dhunë, duke menduar që ajo funksionon.
“Lifti ka qenë jashtë funksionit, dhe qytetari e ka hapur atë me dhunë për të shkuar në Qendrën e Pulmologjisë. Pra, vizitori nuk ka ndjekur rrugët të cilat dërgojnë për në këtë qendër, por ka përdorur një lift që është jashtë funksionit dhe e ka hapur derën me zor, dhe kur ka hyrë brenda, menjëherë ka rënë poshtë. Nuk mund të them asgjë për gjendjen e tij shëndetësore, pasi që janë duke ju bërë të gjitha ekzaminimet në Qendrën emergjente”, tha Qyqalla.
