Nga ky bodrum persona ende të paidentifikuar kanë hapur një të çarë në dhomën e kasafortës, së një banke të nivelit të dytë duke grabitur rreth 20 milionë lekë të reja.
Ngjarja është njoftuar mëngjesin e sotëm nga punonjësit e bankës, e cila ndodhet në rrugën “Ismail Qemali”, në qendër të Tiranës, në zonën e ish-Bllokut.
Ngjarja ka ndodhur gjatë natës dhe në mëngjes është parë një e çarë në mur me përmasat 30 me 50 cm. Sipas policisë pasi është hapur e çara autorët, që ende nuk dihet sa kanë qenë, kanë thyer kasafortën duke marrë shumën e parëve dhe duke u larguar nga aty pa lënë gjurmë.
Policia dhe prokuroria kanë ngritur një grup hetimor, i cili ka zbardhur dinamikën e ngjarjes, por jo autorët. Nga veprimet paraprake dyshohet se grabitësit kanë punuar për tre ditë me radhë duke hapur në mur të çarën, e cila ishte e mjaftueshme për të hyrë një njeri.
Më pas kanë thyer kasafortën duke u larguar qetësisht nga aty. Burime nga grupi hetimor thonë se do jetë e vështirë për të identifikuar autorët pasi kamerat e bizneseve në këtë rrugë nuk kanë punuar, duke qenë se prej kohësh nuk mirëmbaheshin.
Të njëjtat burime thanë se ditën e premte ka rënë alarmi i bankës, por nga kontrolli i kryer nga punonjësit e sigurisë nuk është gjetur asnjë anomali.
Janë pyetur disa punonjës të bankës si rojet e policisë private, por dëshmitë e tyre nuk kanë ndihmuar shumë në zbardhjen e ngjarjes. Grupi hetimor ka sekuestruar kamerat e sigurisë së bankës si dhe ato të bashkisë dhe policisë të cilat kanë qenë funksionale. /TV KLAN
