Dy profesorë të Shkollës së Mesme Teknike “Fan Noli” në Podujevë, janë bërë për spital nga nxënësit e tyre, për shkak se këta të fundit ua kishin mbyllur notën 1, duke ua humbur kështu vitin.
Gazeta Blic ka marrë vesh se ngjarja ka ndodhur ditën e martë. Nxënësit kanë sulmuar profesorin e gjuhës shqipe M. SH. dhe profesorin J. D. (emra të njohur për redaksinë), të cilët kanë pësuar edhe lëndime trupore, si pasojë e të cilëve kanë marrë tretman mjekësor, raporton gazetablic.com.
Lajmi është konfirmuar edhe nga drejtori i Policisë së Kosovës në Podujevë, Bekim Bislimi. Ai ka thënë për Gazetën Blic se ngjarja ka ndodhur të martën rreth orës 14 e 10 minuta në oborrin e shkollës “Fan Noli” në Podujevë.
“Janë sulmuar dy profesorë nga nxënësit e tyre. Për shkak të këtij sulmi ata kanë pësuar lëndime të lehta trupore dhe kanë marrë tretman mjekësor”, ka thënë Bislimi.
Sipas tij, të dyshuarit janë shoqëruar në polici dhe rasti është duke vazhduar në proredurë të rregullt.
