Përveç Policisë, edhe ekipet e forenzikës janë duke kryer punën e tyre në vendin ku ndodhi plaçkitja e armatosur e një banke në dalje të Prishtinës.
Deri më tani, Policia ka konfirmuar se katër persona kanë kryer këtë plaçkitje, që si pasojë pati vjedhjen e thasëve më para që sigurimi i bankës po fuste në objektin ku ndodhi rasti, në Çagllavicë.
Gazeta Express ka raportuar se tre prej katër plaçkitësve ishin të armatosur me armë të gjata. Ata kanë arritur të plaçkitin thasët me para që po futeshin në objekt nga sigurimi i bankës, përkundër se paratë në bankë silleshin me kombi nga pjesëtarët e sigurimit të bankës.
Plaçkitja ka ndodhur rreth orës 15:00. Plaçkitësit kanë arritur të largohen menjëherë nga vendi i ngjarjes. Filiali i bankës e cila është plaçkitur është e “Teb Banka”, shkruan Gazeta Express.
Policia, po ashtu, ka njoftuar se ka identifikuar veturën me të cilën katër të dyshuarit kanë arritur të largohen nga vendi i ngjarjes pasi kryen plaçkitjen.
Gazeta Express pak më parë ka sjellë edhe fotografi nga vendi i ngjarjes, pak minuta pasi ndodhi rasti në fjalë. /GazetaExpress/.
