Dani Alves ka vendosur të largohet nga Barcelona, ka bërë të ditur sekretari teknik i klubit, Robert Fernandez.
Ai ka konfirmuar se reprezentuesi brazilian ka shfrytëzuar opsionin për largim si futbollist i lirë, i vlefshëm deri më 5 qershor.
“Dani Alves ka vendosur të largohet”, deklaroi Fernandez për të përditshmen sportive katalane “Mundo Deportivo”. “Është një vendim personal të cilin ne e respektojmë”, u shpreh ai.
Alves iu bashkua Barcelonës nga Sevilla më 2008 dhe u bë një prej futbollistëve kryesorë të gjigantit nga “Camp Nou”.
Por, Fernandez mohoi mundësinë e largimit të Javier Mascheranos, që njësoj si Alves kërkohet nga Juventus.
“Nuk kam as më të voglin dyshim se Mascherano do të mbetet këtu. Ai është futbollist shumë i rëndësishëm për Barcelonën”, theksoi Fernandez.
