Zjarr i madh në kufirin Kosovë-Shqipëri, i afrohet fshatrave
Fshatrat përreth kufirit Kosovë Shqipëri janë në alarm.
Zjarret kanë përfshirë malet në kufirin Kosovë-Shqipëri, e kur nuk kishte se si të shkonte më keq, ato zjarre i janë afruar fshatrave. Lexues që jetojnë në ato zona kanë treguar se shtëpitë në fshatin Popoc janë të rrezikuara më së shumti, por jashtë rrezikut nuk janë as shtëpitë e fshatit Shishman dhe Ponoshec.
Nga pamjet e dërguara shihet se zjarret janë përhapur në përmasa të mëdha.
Gjatë ditës, Express kishte kontaktuar edhe Xhavit Jasharin, Komandanti i Zjarrfikësve në Gjakovë, i cili ka thënë se nuk kanë arritur ta shuajnë atë.
“Po, është e vërtetë. Tash për tash jam në vendin ku është zjarri, pra në fshatin Popoc. Vendi quhet Vollka, e fshati Popoc. Zjarri është në përmasa shumë të mëdha. Është ka punon edhe Zoti kundër neve, është ka frynë jashtëzakonisht shumë sot në Gjakovë. Zjarri ka fillu para 4 ditësh. Është vend shumë kodrinor-malor, e po duhet 11 kilometra me ecë në këmbë veç për me arritë te vatra e zjarrit, po kur nuk po ke ujë edhe mjete të tjera që duhen për me shu zjarrin, është e pamundshme që të intervenojmë me fikë shpejt”, ka treguar ai.
Lexo edheVjosa Osmani takohet me mësuesen e saj të parë
Ai kishte thënë se 40 zjarrfikës gjatë ditës kanë qëndruar në mal duke tentuar që ta ndalojnë, por për shkak të përmasave të mëdha vështirë të kontrollohet.
