Partia e Kadri Veselit e ka zyrtarizuar, Bajrush Xhemajlin, si Nënkryetar Organizativ i PDK’së. Këtë njoftim e kanë dhënë pas Konventës, në të cilën kanë bërë edhe disa ndryshime në Kryesinë e kësaj partie.
Bajrush Xhemajli është bërë Zëvendës i Kadri Veselit në PDK. Ai ka marrë pozitën e Nënkryetarit Orgnizativ.
Këtë e ka bërë të ditur PDK nëpërmjet një komunikate për media, në të cilën kanë treguar se kjo parti do të angazhohet për angazhimin e grave prej 40 për qindësh në institucionet e Kosovës.
“Bajrush Xhemajli, nënkryetar organizativ i PDK-së, falenderoi të gjitha strukturat nëpër degët e PDK-së, ndërsa Justina Shiroka Pula, kryetare e Gruas Demokratike, pohoi se lidershipi i PDK-së, bashkë me kryetarët e Degëve, të angazhohet që të zbatohet vendimi i kryetarit dhe strukturave drejtuese të partisë, për rritjen e përqindjes së gruas në kuotën 40 përqind”, thuhet në njoftimin e PDK’së.
Por, kush është Bajrush Xhemajli?
Nënkryetari i ri Organizativ i PDK’së më herët kishte qenë anëtar i Kryesisë së PDK’së dhe Kryetar i Komunës së Ferizajt.
Mirëpo, kishte dhënë dorëheqje nga kjo pozitë kur kishte shkaktuar një aksident më 21 maj të vitit 2009 me pasojë vdekjen e të riut Labinot Rrustemi.
Pas një procesi të gjatë gjyqësor, Xhemajli ishte dënuar me dy vite burgim, të cilat i kishte vuajtur nëpër burgjet e Kosovës.
Pas përfundimit të dënimit, ai ishte riktheyer jetës politike, në PDK.
Tash, është emëruar edhe Nënkryetar i Partisë.
Bajrush Xhemajli kishte qenë edhe i dënuar politik në kohën e Jugosllavisë.
