Zëvendëspresidenti i Shteteve të Bashkuara të Amerikës, Mike Pence, do të realizojë javën e ardhshme një turne vizitash në Egjipt dhe Izrael pavarësisht manifestimeve, tensioneve diplomatike dhe anulimit të takimeve të parashikuara në rajon, pas vendimit të njëanshëm dhe të kundërshtuar nga Presidenti Donald Trump për të shpallur Jerusalemin kryeqytet të Izraelit.
Këshilltarët e zëvendëspresidentit amerikan konfirmuan se Pence do të shkojë në Kajro dhe në Jerusalem gjatë kësaj vizite pesëditore, e cila do të fillojë të martën dhe do të përfshijë takime me drejtuesit izraelit, Benjamin Netanyahu dhe egjiptian Abdel Fattah el-Sisi, si dhe një fjalim drejtuar Parlamentit izraelit (Knesset).
Pence do të niset të martën për shkak të një votimi shumë të rëndësishëm në Kongres për reformën e taksave në SHBA. /ATSH
