Një person u gjet i pajetë dhe thuajse i shkrumbuar brenda një automjeti me targa të Kosovës.
Ngjarja e rëndë ndodhi në fshatin Derven të Fushë-Krujës, ku policia në fund të një toke pa asnjë lloj objekti të ndërtuar në të, gjeti një makinë të djegur. Brenda saj u konstatua edhe trupi i djegur i një personi, identiteti i të cilit ende nuk është bërë i ditur nga policia. Pritet që identifikimi i tij të bëhet përmes analizave të ADN-së.
Burime nga policia thonë se automjeti i djegur me targa të Kosovës është futur në territorin shqiptar para 5 ditësh dhe ka ardhur nga Kosova përmes pikës kufitare të Morinës. Automjeti rezulton të jetë në pronësi të Xhavit Osmanit nga Mitrovica, por nuk dihet nëse edhe personi i vdekur është i njëjti.
“Specialistët për Krimet në bashkëpunim me Prokurorinë e Rrethit Gjyqësor Krujë po punojnë për identifikimin e personit të djegur dhe zbardhjen e plotë të shkaqeve të ngjarjes”, tha Policia në një njoftim paraprak.
Nuk dihet ende nëse personi është vrarë më parë me armë zjarri, apo nëse është djegur i gjallë brenda automjetit. Ekspertiza mjeko-ligjore pritet të hedhë dritë mbi ngjarjen.
