Ngërçi politik që ka kapluar shtetin që tre muaj nuk ka lënë sferë pa “prekur”.
Nga ky kolaps kanë pësuar edhe kategoritë e Luftës Çlirimtare të Kosovës.
Janë 33 mijë e 141 veteranë që marrin pension nga shtetit, mirëpo, këtë të muajit gusht nuk e kanë marr, për shkak se Kuvendi i Kosovës nuk mund të shqyrtoj buxhetin.
Kjo paralize e Kuvendit, ka ndikuar që paret e dedikuara për këtë kategori për muajin gusht të mos merren.
Një veteran në kushte anonime për Indeksonline ka thënë se pensioni më të cilin mbanë familjen këtë muaj e ka lënë keq.
Jo vetëm veteranët, edhe familjet e dëshmorëve të cilët e kanë fituar statusin e dëshmorëve pas ankesave nuk janë duke marr pension.
Kjo për shkak të moskonstituimit të Kuvendit dhe formimit të Qeverisë.
Familjarët e dëshmorëve ende nuk kanë aplikuar për benefitet që u takojnë për shkak të mosformimit të institucioneve.
Kryetari i Shoqatës së familjarëve të dëshmorëve, Xhavit Jashari ka thënë se kategoria më e ndjeshme ka mbetur peng e Qeverisë. Jashari për Indeksonline ka thënë se ka mjaft ankesa nga familjarët e kësaj kategorie.
“Kategoria e dëshmorëve është me e ndjeshmja e cila me ligj përcakton benefitet që duhet t’i përfitoj familja. Mirëpo, këta kanë mbetur peng e Qeverisë. Të drejtat e familjeve të dëshmorëve duhen të zbatohet. Është e pakuptimit të mbesin peng e Qeverisë. Kuvendi e njeh statusin e tyre, Qeveria duhet të zbatoj ligjet” ka thënë Jashari.
Ai me tutje është shprehur i irrituar me vonesat e krijimit të komisionit shëndetësor për përcaktimin e invaliditetit.
Kryetari Xhavit Jashari, ka komentuar edhe hetimet e fundit që ka nisur prokuroria ndaj listave të veteranëve.
Ai ka thënë se komandant e zonave dhe vartësit e tyre duhet të dinë më mirë për veteranët kush ka qenë dhe kush jo.
“Kushdo që ka bërë shkelje duhet të përgjigjet para ligjit. Unë mendoj ai i cili nuk ka qenë pjesë e luftës nuk është mirë të futet në këtë kategori. Si anëtar i komisionit të verifikimit të këtyre kategorive, është mirë të pyeten komandantët, se ata janë që i kanë nënshkruar, ata e dinë më mirë se kush ka qenë, e kush jo. Nëse ka ndodh një gjë e tillë, ka ndodh nga komandant e zonave dhe varësit e tyre” ka thënë Jashari për Indeksonline.
Disa ditë më parë, Indeksonline raportoj lidhur me nisjen e hetimeve të prokurorisë lidhur me listat e veteranëve për keqpërdorime eventuale.
Nga prokuroria kanë paralajmëruar që këto hetime mund t’i ndryshojnë statusin dikujt dhe të zvogëlohet numri prej 42 mijë veteranë të UÇK-së.
Edhe kategoria e invalidëve ka mbetur peng e formimit të Kuvendit dhe Qeverisë.
Ndonëse ka pesë vit që kur është përmendur funksionalizimi i komisionit mjekësor për përcaktimin e shkallës së invaliditetit, ende ky komision nuk është formuar.
Ky komision do të përcaktonte shkallën e invaliditetit të invalidëve të luftës.
Mirë, fatkeqësisht, një komision i tillë tash e 5 vite është zvarritur nga institucionet përkatëse.
Ndryshe, edhe pak ditë bëhen 3 muaj nga data kur janë mbajtur zgjedhjet të parakohshme mirëpo që ende Qeveria e Kosovës nuk është formuar.
