Kryetari PDK-së, Kadri Veseli, sot ka vizituar Parkun e Biznesit në Drenas. Së bashku me të ishte edhe kandidati për të parin e Drenasit, Ramiz Lladrovci.
Veseli për Parkun e Biznesit ka thënë se është shndërruar në vend mjaft tërheqës për investitorët.
“Me ambientin e kompletuar, Parku i Biznesit në Drenas është shndërruar në një vend mjaft tërheqës për bizneset vendore dhe ndërkombëtare. Sot takova punëtorë të shumë kompanive aty dhe jam i gëzuar që ky park industrial është zgjeruar e pasuruar dhe është bërë motor i ekonomisë sonë”, ka thënë Veseli.
I pari i PDK-së ka thënë se sektori privat luan një rol të rëndësishëm në zhvillimin ekonomik të vendit.
“Jam i bindur se zhvillimi ekonomik, rritja e mirëqenies së qytetarëve dhe hapja e vendeve të reja të punës nuk vjen nga shteti, por nga sektori privat. Strategjia e derregullimit është ajo që nevojitet për të përmirësuar klimën e biznesit. Për të arritur një zhvillim ekonomik të qëndrueshëm, ne duhet të udhëhiqemi nga parimi: sa më shumë ekonomi tregu që të jetë e mundur dhe aq shtet sa të jetë e nevojshme”, ka shtuar Veseli./Drenicapress.info/
