Në kuadër të programit shtetëror “Kosova, Shtet i Xhudos”, sot në Pejë është vendosur gurëthemeli i kompleksit sportiv “Qendra Nacionale e Xhudos”, një projekt i rëndësishëm për zhvillimin e mëtejmë të sportit në vend.
Në ceremoninë e inaugurimit morën pjesë krerë institucionalë dhe figura të njohura të sportit. Fjalë rasti mbajtën Kryeministri i Republikës së Kosovës, Albin Kurti, Kryetari i Federata e Xhudos e Kosovës, Agron Kuka, si dhe kryemjeshtri i xhudos, Driton Kuka, shkruan IndeksOnline.
Të pranishëm në këtë ngjarje ishin edhe Ministri i Rinisë dhe Sportit, Blerim Gashani, Ministri i Administrimit të Pushtetit Lokal, Elbert Krasniqi, përfaqësues institucionalë, si dhe kampionët e xhudos së Kosovës. Në ceremoni morën pjesë edhe sportistë mysafirë nga Ukrainë, të cilët aktualisht po zhvillojnë një kamp përgatitor në Kosovë.
Kompleksi “Qendra Nacionale e Xhudos” pritet të shërbejë si një qendër moderne për përgatitjen profesionale të sportistëve, zhvillimin e talenteve të rinj dhe avancimin e mëtejshëm të xhudos kosovare në arenën ndërkombëtare.
Ky projekt konsiderohet një hap i madh përpara për sportin në vend dhe një dëshmi e përkushtimit institucional për të mbështetur sukseset e vazhdueshme të xhudos kosovare.
Programi “Kosova, Shtet i Xhudos” mbështetet nga Ministria e Kulturës, Rinisë dhe Sportit, ndërsa njoftimi për këtë ngjarje është bërë nga Federata e Xhudos e Kosovës./IndeksOnline/
