Avokati Besnik Berisha ka reaguar pas vendimit për lirimin nga paraburgimi të pesë zyrtarëve policorë, të cilët ai i ka mbrojtur, duke e cilësuar këtë si një fitore të drejtësisë dhe arsyes mbi padrejtësinë.
“Drejtësia foli. Pesë zyrtarët policorë që padrejtësisht u paraburgosën, nga sot janë të lirë. I lumtur sa s’ka më, jo vetëm sepse drejtësia më në fund u vu në lëvizje, por sepse padrejtësia nuk mori formë të përhershme”, ka deklaruar Berisha.
“Ata vepruan në përmbushje të detyrës, jo në shkelje të saj. Çdo hap i tyre u shoqërua me kujdes, proporcionalitet dhe përpjekje për të shmangur rrezikun. Çdo gjykim ndaj tyre duhet të jetë profesional, jo populist”, ka theksuar avokati.
Berisha ka falënderuar të gjithë ata që, sipas tij, nuk heshtën përballë padrejtësisë dhe ka ritheksuar përkushtimin për të qëndruar gjithmonë në anën e ligjit.
“Ne do të jemi gjithmonë në krah të ligjit, edhe kur ai sulmohet nga ata që s’kanë asnjë lidhje me të”, është shprehur ai.
