Valdete Idrizi e ka akuzuar Faton Pecin për shpifje rreth një deklarate të ministrit në detyrë të Bujqësisë të bërë të dielën në mbrëmje në televizionin ATV.
Idrizi ka paralajmëruar padi për shpifje ndaj Pecit.
“Në emisionin Context në ATV, mbrëmë kandidati i partisë GUXO ka shpifur ndaj meje kinse jam shkarkuar nga detyra e Drejtoreshës për Kulturë, Rini dhe Sport në Komunën e Mitrovicës”, ka thënë ai.
“Të gjithë qytetarët e dinë, përfshirë edhe opinionin e gjerë publik, që unë kam kërkuar lirim nga detyra për shkak të obligimeve familjare”, tha Idrizi.
“Unë pres kërkimfalje nga z. Peci për këtë shpifje, përndryshe do ta denoncoj”, tha ajo.
Idrizi tha se Mitrovicës nuk i duhet një kryetar arrogant e prepotent.
“Një mendjemadh e përçarës. I korruptuar e shpifës. Nuk i duhet as një turist për kryetar. Mitrovicës i duhet për kryetar dikush që bashkëjeton me përditshmërinë e qytetarëve dhe e ndjen qytetin. Mitrovicës i duhet Arian Tahiri!”.
